An Claidheamh Soluis, Éanair 13, 1906.

Is minic litreacha i gcló ins na páipéaraibh laetheamhla ó Ghaedhealaibh agus ó dhaoinibh ar dhual dóibh bheith Gaedhealach agus gan d’ainm fútha acht leas-ainm gránna éigin de dhéantús Gallda. Rud is measa ‘ná sin, is minic cuirtear litreacha chugainn féin le cur i gcló san gClaidheamh agus trácht ionnta ar ‘Father Peter O’Leary,’ agus ar ‘Mr. John MacNeill,’ agus ar ‘Mr J. J. Doyle,’ agus mar sin de. Cia hiad ‘Father Peter O’Leary’, agus ‘Mr. John MacNeill,’ agus ‘Mr. J. J. Doyle’ i n-aon chor? Níl aithne againne ortha. Is maith is eol dúinn cáilidheachta agus tréithe an Athar Pheadair Uí Laoghaire, agus Eoin Mhic Néill, agus Shéamuis Uí Dhubhghaill; acht maidir le ‘Father Peter O’Leary,’ agus ‘Mr. John MacNeill,’ agus ‘Mr. J. J. Doyle’—is dócha gur Gaill iad, ó’s rud é gurab ainmeacha agus sloinnte Gallda atá ortha.

Cia an chiall do Ghaedhealaibh leas-ainmeacha do chur síos dóibh féin nó do Ghaedhealaibh eile? Nuair bhaist an chúirt iasachta i gCorcaigh ‘Edmond O’Neill’ ar Éamonn calma, bhíomar i dtríthibh ag gáiridhe; is baoghalach gur fúinn féin badh cheart do chuid againn bheith ag gáiridhe an fhaid is leanamuid de ‘Peter,’ ‘John,’ agus ‘James’ do ghlaodhach orainn féin agus ar a chéile.

Seachainimís an iasacht. Ní féidir do chuid againn an Béarla do chaitheamh do leath-taobih fós. Acht d’féadfadh gach mac mathar againn ár leas-ainmneacha Gallda do chaitheamh uainn gan duadh. Cá gábhadh iad? Níl aon ghábhadh leo, agus nuair nach bhfuil gábhadh leo, cia an chiall leanamhaint dóibh?