RATRA,
FRENCHPARK,
CO. ROSCOMMON.
Saṁain 8, 1898.
A Ṡaoi Ḋílis,
Ċonnairc mé le luṫġáire ṁóir go raiḃ siḃ ag cur cuideaċta ar bunn ann sna Ceallaiḃ Beaga le sean-teanga ár sinnsear do ċongḃáil beó, agus do ċur ann san áit áird do ḃí aici ann san tír, fad ó. Nár leigiḋ Dia go d-tiucfaiḋ an lá ann a sinfiḋ náisiúnta an doṁain ṁóir, a méar, go sgigeaṁail, anaġaiḋ Éireann, le tarcuisne agus le magaḋ, ag raḋ léi naċ ḃfuil innti aċt náisiún claḋaire, gan ṁaiṫ gan tairḃe, do ċaiṫ ḋí, féin gaċ maiṫ do ṫug Dia dí, agus gaċ maiṫ do ḃí ar a seilḃ féin, mar atá an teanga is sine agus is binne ar ṫalaṁ na Críostiuġeaċta, agus gaċ sean-ḟaisiún agus sean-nós breaġ do ḃí ag ar seaċt sinnsearaiḃ roṁainn.
Eirigiḋe suas i n-ainm Dé, agus na leigiḋ an náire agus an sgannail sin do ṫeaċt orraiḃ. Conġaigiḋ beó gaċ sean-nós fíor-Ġaoḋalaċ, fír-Éireannaċ d’a ḃfuil againn. Taisbeánaiḋ do’n doṁan naċ ḃfuilmid ‘nár Sacsanaiġ’ go fóil, agus naċ mbéiḋmid ’nár Sacsanaiġ’ ċoiḋċe! Má tá siḃ dá ríriḃ ’san obair seó ná leigiḋ do na páistiḋ teanga ár náṁad do laḃairt le ċeile ann a dtiġṫiḃ féin, agus tógfamaoid fál agus, cloiḋe idir sinn fein agus spiorad na Sacsanaċta, naċ léimfiḋ an náṁaid ṫairis go bráṫ. Tá áṫas mór orm go ḃfuil Tír Ċonaill ag dúisiuġaḋ. Go gcuiriḋ Dia raṫ ar an obair ḃréaġ atá anois ar bun.
Beir buaiḋ agus beannaċt ó do ṡearḃfoġanta uṁal.
AN CRAOIḂÍN AOIḂINN.